ગુજરતમાં છેલ્લા ૨૪ કલાકમાં ૨૧ તાલુકામાં મેઘમેહર

હવામાન વિભાગે આગામી સાત દિવસ પણ ગુજરાતમાં વરસાદ થશે તે અંગેની આગાહી કરી છે. હવામાન વિભાગે બુધવારે અને ગુરૂવારે સામાન્ય વરસાદની સાથે ભારે વરસાદની પણ આગાહી કરી છે.

samay mirror

June 18, 2024

1 minute

ગુજરાત

ગુજરાતમાં હાલ અનેક વિસ્તારોમાં ગાજવીજ સાથે વરસાદ થઇ રહ્યો છે. હવામાન વિભાગે આગામી સાત દિવસ પણ ગુજરાતમાં વરસાદ થશે તે અંગેની આગાહી કરી છે. હવામાન વિભાગે બુધવારે અને ગુરૂવારે સામાન્ય વરસાદની સાથે ભારે વરસાદની પણ આગાહી કરી છે. હવામાન વિભાગે જણાવ્યુ કે, ગુજરાતમાં ચોમાસું હજી નવસારી સુધી જ આવ્યું છે. તો છેલ્લા 24 કલાકમાં 21 તાલુકામાં વરસાદ નોંધાયો છે. જેમા સૌથી વધુ બાબરામાં બે ઇંચ જેવો વરસાદ ખાબક્યો છે. આ સાથે હવામાન વિભાગના જણાવ્યા પ્રમાણે, સવારે 10 વાગ્યા સુધીમાં છ જિલ્લામાં વરસાદ પડવાની શક્યતા છે.

હવામાન વિભાગે આપેલી માહિતી પ્રમાણે, છેલ્લા 24 કલાકમાં 21 તાલુકામાં વરસાદ નોંધાયો છે. જેમા સૌથી વધુ અમરેલીના બાબરામાં 1.8 ઇંચ, ભાવનગરમાં ગરિયાધાર 1.16 ઇંચ, અમરેલીના લીલિયામાં અને કવાંટમાં એક એક ઇંચ વરસાદ વરસ્યો છે. જેના કારણે ગુજરાતીઓને ગરમીમાંથી આંશિક રાહત થઇ છે. પરંતુ બફારામાં કોઇ રાહત મળી નથી રહી.

હવામાન વિભાગના આંકડા પ્રમાણે, વલસાડના ઉમરગામ, નાંદોદ, અમરેલીના લાઢી, કચ્છના માંડવી, દ્વારકામાં 10 એમએમ વરસાદ નોંધાયો છે.ત્રણ જિલ્લામાં વરસાદની આગાહી આપવામાં આવી છે. જેમાં ભાવનગર, અમરેલી, ગીરસોમનાથમાં ગાજવીજ સાથે વરસાદ ખાબકી શકે છે. આ વિસ્તારોમાં કડાકા ભડાકા અને ભારે પવન સાથે વરસાદ ખાબકી શકે છે. આ ઉપરાંત સવારે 10 વાગ્યા સુધી દક્ષિણ ગુજરાતના ત્રણ જિલ્લામાં મધ્યમ વરસાદની આગાહી કરવામાં આવી છે. હવામાન વિભાગના મતે સવારે 10 વાગ્યા સુધીમાં નવસારી, ડાંગ, વલસાડ ઉપરાંત દમણ અને દાદરાનગરહવેલીમાં મધ્યમથી સામાન્ય વરસાદ થઈ શકે છે.

હવામાન વિભાગના અમદાવાદ કેન્દ્રના મોસમ વૈજ્ઞાનિક, રામાશ્રય યાદવના જણાવ્યા પ્રમાણે, મંગળવારે એટલે આજે દાહોદ, છોટાઉદેપુર, સુરત, ડાંગ, નવસારી, વલસાડ, તાપી, દમણ, દાદરા નગર હવેલી તથા સૌરાષ્ટ્ર અને કચ્છના રાજકોટ, પોરબંદર, અમરેલી, ભાવનગર, જુનાગઢ, ગીર સોમનાથ, બોટાદ, દ્વારકા, દીવ તથા કચ્છમાં છૂટાછવાયા સ્થળો પર ગાજવીજ સાથે હળવાથી મધ્યમ વરસાદની આગાહી કરવામાં આવી છે.

આ સાથે આવતીકાલે કેટલાક વિસ્તારોમાં ભારે વરસાદની આગાહી કરવામાં આવી છે. હવામાન વિભાગના મોસમ વૈજ્ઞાનિક રામાશ્રય યાદવના જણાવ્યા પ્રમાણે, 19 અને 20મી જૂનના રોજ કેટલાક વિસ્તારોમાં ગાજવીજ સાથે હળવાથી સામાન્ય વરસાદની આગાહી કરવામાં આવી છે. આ સાથે અનેક વિસ્તારોમાં ભારે વરસાદની પણ આગાહી કરવામાં આવી છે. જેમા અરાવલ્લી, પંચમહાલ, દાહોદ, મહીસાગર અને દક્ષિણ ગુજરાતનાં તમામ જિલ્લાઓનો સમાવેશ થાય છે.