બાંગ્લાદેશમાં ફરી હિંસા, ચિન્મય દાસની સુનાવણી પહેલા વકીલ પર કરાયો હુમલો

હાલમાં બાંગ્લાદેશમાં લઘુમતી હિન્દુ સમુદાય વિરુદ્ધ હિંસા જોવા મળી રહી છે. તાજેતરમાં ઈસ્કોનના સંત ચિન્મય કૃષ્ણ દાસની દેશદ્રોહના કેસમાં ધરપકડ કરવામાં આવી હતી.

samay mirror

December 03, 2024

1 minute

ઇન્ટરનેશનલ

હાલમાં બાંગ્લાદેશમાં લઘુમતી હિન્દુ સમુદાય વિરુદ્ધ હિંસા જોવા મળી રહી છે. તાજેતરમાં ઈસ્કોનના સંત ચિન્મય કૃષ્ણ દાસની દેશદ્રોહના કેસમાં ધરપકડ કરવામાં આવી હતી. ત્યારથી દેશમાં તેમની મુક્તિની માંગ ઉઠી રહી છે. તેમના જામીન અંગેની સુનાવણી આજે 3જી ડિસેમ્બરે હાથ ધરાશે. દરમિયાન, હવે ઇસ્કોન કોલકાતાના પ્રવક્તા રાધારમ દાસે સોમવારે દાવો કર્યો હતો કે ચિન્મય દાસનો કેસ લડનારા વકીલ રમણ રોય પર હુમલો કરવામાં આવ્યો હતો અને હાલમાં તેઓ હોસ્પિટલમાં દાખલ છે.

રાધારામ દાસે જણાવ્યું કે ઇસ્લામ ધર્મના કટ્ટરપંથીઓએ વકીલના ઘરમાં તોડફોડ કરી. કોલકાતાના ઇસ્કોનના પ્રવક્તાએ કહ્યું કે વકીલ રોય આ હુમલામાં ખરાબ રીતે ઘાયલ થયા છે અને તેઓ હાલમાં આઈસીયુમાં છે અને જીવન અને મૃત્યુની લડાઈ લડી રહ્યા છે.

રાધારામ દાસે રમણ રોયની તસવીર શેર કરી અને તેને સોશિયલ મીડિયા હેન્ડલ X પર પોસ્ટ કરી અને કહ્યું, વકીલ રમણ રોય માટે પ્રાર્થના કરો. તેનો એક માત્ર દોષ એ છે કે તે ચિન્મય પ્રભુનો કેસ લડી રહ્યો છે. ઇસ્લામિક કટ્ટરપંથીઓએ તેના ઘરની તોડફોડ કરી અને તેના પર એટલી ખરાબ રીતે હુમલો કર્યો કે તે હાલમાં ICUમાં છે.

30 ઓક્ટોબરે ચટગાંવના કોતવાલી પોલીસ સ્ટેશનમાં હિન્દુ સંત ચિન્મય દાસ સહિત 19 લોકો વિરુદ્ધ દેશદ્રોહનો કેસ નોંધવામાં આવ્યો હતો. તેના પર હિંદુ સમુદાયની એક રેલી દરમિયાન ચિટગોંગના ન્યૂ માર્કેટ વિસ્તારમાં બાંગ્લાદેશના રાષ્ટ્રધ્વજનું અપમાન કરવાનો આરોપ હતો. આ પછી, તેના જામીન અંગેની સુનાવણી 3જી ડિસેમ્બરે થવાની છે.

બાંગ્લાદેશમાં હિન્દુઓની વસ્તી ઘટી છે

બાંગ્લાદેશના ઈતિહાસ પર નજર કરીએ તો, વર્ષ 1971 દરમિયાન બાંગ્લાદેશની વસ્તીના લગભગ 22 ટકા હિંદુ સમુદાય હતો. જો કે, હવે હિંદુ સમુદાય બાંગ્લાદેશની વસ્તીના માત્ર 8 ટકા જેટલો છે.

ચિન્મય કૃષ્ણ દાસની 25 નવેમ્બરે દેશદ્રોહના આરોપમાં ધરપકડ કરવામાં આવી હતી. આ પછી, દેશના હિંદુઓમાં ગુસ્સો છે અને તેઓ વિરોધ કરી રહ્યા છે અને પ્રભુની મુક્તિના સમર્થનમાં અવાજ ઉઠાવી રહ્યા છે. ભારતે પણ બાંગ્લાદેશની આ કાર્યવાહીની નિંદા કરી છે.