જમ્મુ-કાશ્મીરના કિશ્તવાડમાં આતંકવાદી હુમલો, ગ્રામ રક્ષા જૂથના બે સભ્યોના મોત

જમ્મુ અને કાશ્મીરના કિશ્તવાડ જિલ્લામાં એક શંકાસ્પદ આતંકવાદી હુમલામાં વિલેજ ડિફેન્સ ગ્રુપ (VDG)ના બે સભ્યો માર્યા ગયા છે. સુરક્ષા દળોએ હજુ સુધી તેમના મૃતદેહો બહાર કાઢ્યા નથી

samay mirror

November 08, 2024

1 minute

નેશનલ

જમ્મુ અને કાશ્મીરના કિશ્તવાડ જિલ્લામાં એક શંકાસ્પદ આતંકવાદી હુમલામાં વિલેજ ડિફેન્સ ગ્રુપ (VDG)ના બે સભ્યો માર્યા ગયા છે. સુરક્ષા દળોએ હજુ સુધી તેમના મૃતદેહો બહાર કાઢ્યા નથી. દરમિયાન પોલીસે ગ્રામીણ સંરક્ષણ જૂથના સભ્યો નઝીર અહેમદ અને કુલદીપ કુમારને શોધવા માટે મોટા પાયે સર્ચ ઓપરેશન શરૂ કર્યું છે. બંને જણા તેમના ઢોર ચરાવવા નજીકના જંગલ વિસ્તારમાં ગયા હતા, પરંતુ પરત ફર્યા ન હતા.

દરમિયાન જમ્મુ અને કાશ્મીરના મુખ્ય પ્રધાન ઓમર અબ્દુલ્લા અને તેમના પિતા ફારૂક અબ્દુલ્લાએ કિશ્તવાડમાં બે VDG સભ્યોની હત્યાની નિંદા કરી હતી.

તેમણે કહ્યું છે કે આ પ્રકારની બર્બર હિંસા જમ્મુ અને કાશ્મીરમાં લાંબા ગાળાની શાંતિ હાંસલ કરવામાં નોંધપાત્ર અવરોધ બની રહી છે. દુઃખની આ ઘડીમાં તેમના વિચારો અને પ્રાર્થના મૃતકોના પરિવારજનો સાથે છે.

આ હત્યાની જવાબદારી કાશ્મીર ટાઈગર્સે લીધી છે. કાશ્મીર ટાઈગર્સ દ્વારા જારી કરવામાં આવેલા નિવેદનમાં કહેવામાં આવ્યું છે કે વીડીજીના બે સક્રિય સૈનિક કુલદીપ કુમાર અને નઝીર મુજાહિદ્દીન ઈસ્લામનો પીછો કરતા કિશ્તવાડ વિસ્તારમાં પહોંચ્યા હતા. મુજાહિદ્દીને તેમને પકડી લીધા હતા અને બંનેએ પોતાનો ગુનો કબૂલી લીધો હતો. જે બાદ તેને સજા કરવામાં આવી હતી.

એક વરિષ્ઠ અધિકારીએ જણાવ્યું કે છેલ્લા ઘણા મહિનાઓથી આ વિસ્તારમાં આતંકવાદી ગતિવિધિઓ જોવા મળી રહી છે. તેમણે કહ્યું કે તાજેતરમાં યોજાયેલી વિધાનસભા ચૂંટણી દરમિયાન આ વિસ્તારમાં ઓછામાં ઓછા બે વખત આતંકવાદીઓ અને સુરક્ષા દળો વચ્ચે ગોળીબાર થયો હતો.

દરમિયાન સૂત્રોએ જણાવ્યું હતું કે, બંને વીડીજી સવારે પ્રાણીઓ સાથે ચત્રુના કુંવાડાના જંગલોમાં ગયા હતા. તેઓ સાંજ સુધી પરત ફર્યા ન હતા. ગામના રહેવાસીઓ પોલીસનો સંપર્ક કરે તે પહેલાં આતંકવાદીઓએ બે વીડીજીના ફોટોગ્રાફ્સ જાહેર કર્યા અને કહ્યું કે તેઓ માર્યા ગયા છે.

કુલદીપ કુમારના ભાઈ પૃથ્વીએ કહ્યું કે અમને માહિતી મળી છે કે અહેમદ સાથે મારા ભાઈનું આતંકવાદીઓ દ્વારા અપહરણ કરીને હત્યા કરવામાં આવી છે. તે VDG હતો અને રાબેતા મુજબ ઢોર ચરાવવા ગયો હતો. તેમણે કહ્યું કે મોટા પાયે સર્ચ ઓપરેશન ચાલી રહ્યું છે, પરંતુ હજુ સુધી મૃતકોના મૃતદેહ મળી આવ્યા નથી.

સોપોરમાં એન્કાઉન્ટર, 2-3 આતંકીઓ ઘેરાયા

બીજી તરફ, ઉત્તર કાશ્મીરના સોપોરના સગીપોરા વિસ્તારમાં ઘેરાબંધી અને સર્ચ ઓપરેશન દરમિયાન કેટલીક ગોળીબાર સંભળાયો હતો. પોલીસ અધિકારીએ જણાવ્યું કે, ચોક્કસ ઇનપુટ પર કાર્યવાહી કરીને, પોલીસ અને સેનાની સંયુક્ત ટીમે ગુરુવારે સાંજે સાગીપોરામાં ઘેરાબંધી અને સર્ચ ઓપરેશન શરૂ કર્યું હતું.