કોલકાતા રેપ-મર્ડર કેસમાં દોષિત સંજય રોયને આજીવન કેદની સજા, સિયાલદાહ કોર્ટે ચુકાદો સંભળાવ્યો

કોલકાતા રેપ- હત્યા કેસમાં દોષિત સંજય રોયને સિયાલદાહ કોર્ટે આજીવન કેદની સજા ફટકારી છે. આ સાથે કોર્ટે ૫૦ હજાર રૂપિયાનો દંડ પણ ફટકાર્યો હતો. શનિવારે કોર્ટે સંજયને દોષિત જાહેર કર્યો હતો. સજાની જાહેરાત પહેલાંની સુનાવણી દરમિયાન, સંજય ન્યાયાધીશ સમક્ષ દલીલ કરી રહ્યો હતો. તેણે ન્યાયાધીશને કહ્યું કે હું દોષિત નથી. મને ફસાવવામાં આવી રહ્યો છે. મેં કોઈ ગુનો કર્યો નથી. સીબીઆઈએ કોર્ટમાં સંજય રોય માટે મૃત્યુદંડની માંગ કરી છે.

સજા જાહેર કરતા પહેલા, જ્યારે દોષિત સંજય રોયને કોર્ટમાં રજૂ કરવામાં આવ્યો, ત્યારે ન્યાયાધીશે તેને કહ્યું કે તમે દોષિત છો. સજા વિશે તમારે કંઈ કહેવું છે? આના પર સંજય રોયે કહ્યું કે હું દોષિત નથી. મને ફસાવવામાં આવ્યો છે. ઘણું બધું બરબાદ થઈ ગયું છે. મેં કોઈ ગુનો કર્યો નથી. મારા પર ગુનો કબૂલ કરવા માટે દબાણ કરવામાં આવી રહ્યું છે. મેં રુદ્રાક્ષની માળા પહેરી હતી. જો મેં આ કર્યું હોત, તો મારી રુદ્રાક્ષની માળા તૂટી ગઈ હોત

9 ઓગસ્ટ 2024 ના રોજ, કોલકાતાની આરજી કાર હોસ્પિટલમાં 31 વર્ષીય મહિલા ડૉક્ટર પર નિર્દયતાથી બળાત્કાર કરવામાં આવ્યો હતો. પહેલા તેના પર બળાત્કાર કરવામાં આવ્યો અને પછી તેની હત્યા કરવામાં આવી. સીબીઆઈ કોર્ટે ગયા વર્ષે 12 નવેમ્બરના રોજ બંધ રૂમમાં સુનાવણી શરૂ કરી હતી.

૫૭ દિવસ પછી, સિયાલદહ જિલ્લા કોર્ટના ન્યાયાધીશ અનિર્બાન દાસે તેમને દોષિત જાહેર કર્યા છે. સિયાલદાહ કોર્ટના ન્યાયાધીશે પોતાના નિર્ણયમાં કહ્યું કે આ કેસમાં આરોપી સંજય રોય દોષિત ઠરે છે. કોર્ટે ફોરેન્સિક રિપોર્ટ પર આધાર રાખ્યો. આ અંતર્ગત કોર્ટે સંજય રોયને આ કેસમાં દોષિત ઠેરવ્યા. શનિવારે, જ્યારે કોર્ટે સંજય રોયને દોષિત ઠેરવ્યા, ત્યારે સંજયે ન્યાયાધીશને કહ્યું કે તે દોષિત નથી.

સંજયે કહ્યું કે મને ખોટા કેસમાં ફસાવવામાં આવ્યો છે. મેં આ કર્યું નથી. જેમણે આ કર્યું છે તેમને મુક્ત કરવામાં આવી રહ્યા છે. આરોપીઓ વિરુદ્ધ ભારતીય દંડ સંહિતાની કલમ 64, 66, 103/1 એટલે કે BNS હેઠળ કેસ નોંધવામાં આવ્યો છે. સંજય પર સેમિનાર રૂમમાં ઘૂસીને ડૉક્ટર પર હુમલો કરવાનો અને તેમની હત્યા કરવાનો આરોપ છે.

૮-૯ ઓગસ્ટ ૨૦૨૪ ની રાત્રે બનેલી આ ઘટનાના લગભગ ૧૬૨ દિવસ પછી, કોર્ટે શનિવારે પોતાનો ચુકાદો સંભળાવ્યો અને સંજય રોયને દોષિત ઠેરવ્યા. આ કેસમાં સુનાવણી લગભગ 57 દિવસ સુધી ચાલી. પહેલા આ કેસની તપાસ કોલકાતા પોલીસ કરી રહી હતી. ત્યારબાદ હાઈકોર્ટના હસ્તક્ષેપ બાદ આ કેસ સીબીઆઈને સોંપવામાં આવ્યો. સીબીઆઈએ ૧૩ ઓગસ્ટના રોજ આ કેસની તપાસ પોતાના હાથમાં લીધી. આ પછી તપાસ શરૂ કરવામાં આવી હતી. સીબીઆઈએ ૧૨૦ થી વધુ સાક્ષીઓના નિવેદનો નોંધ્યા. આ કેસમાં કેમેરા ટ્રાયલ લગભગ બે મહિના સુધી ચાલુ રહ્યો.