ઉત્તર પ્રદેશમાં સંભલ હિંસામાં ૪નાં મોત, 20થી વધુ લોકો ઈજાગ્રસ્ત, ઇન્ટરનેટ- સ્કુલ બંધ

ઉત્તર પ્રદેશનું સંભલ રવિવારે હિંસાની આગમાં સળગી ગયું. શાહી જામા મસ્જિદમાં સર્વેને લઈને ભારે હોબાળો થયો હતો. બદમાશોએ વાહનોને આગ ચાંપી હતી અને પોલીસ પર પથ્થરમારો કર્યો હતો. હિંસામાં ૪ લોકોના મોત થયા હતા, જ્યારે SDM સહિત 20થી વધુ લોકો ઘાયલ થયા હતા. પોલીસે મસ્જિદની આસપાસનો વિસ્તાર સીલ કરી દીધો છે. 1 ડિસેમ્બર સુધી કોઈપણ બહારના વ્યક્તિના પ્રવેશ પર પ્રતિબંધ મુકવામાં આવ્યો છે. દરેક ખૂણે-ખૂણે પોલીસ તૈનાત છે.

આ દરમિયાન ગોળીબાર પણ કરવામાં આવ્યો હતો. જોકે, અધિકારીઓનું કહેવું છે કે પોલીસે ગોળીબાર કર્યો ન હતો. મુરાદાબાદ ડિવિઝનના કમિશનર અંજનેય કુમાર સિંહે કહ્યું છે કે બદમાશો જૂથોમાં આવ્યા હતા. તેમના ત્રણ જૂથ હતા, જેઓ સતત ગોળીબાર કરી રહ્યા હતા. ફાયરિંગ અને પથ્થરમારાની વચ્ચે પોલીસે સર્વે ટીમને સલામત રીતે બહાર કાઢી હતી.

અંજનેય કુમાર સિંહની આ ટિપ્પણી પર પણ સવાલો ઉઠી રહ્યા છે. સ્થાનિક લોકોનો દાવો છે કે પોલીસે પણ ગોળીબાર કર્યો હતો. જો કે, અધિકારીનું કહેવું છે કે પોલીસે ભીડને વિખેરવા માટે ટીયર ગેસના શેલ છોડવા પડ્યા હતા. પોલીસે લાઠીચાર્જ કર્યો હતો.

એસપી કૃષ્ણ કુમાર વિશ્નોઈએ કહ્યું કે ઘણી જગ્યાએ આવા વીડિયો વાયરલ થઈ રહ્યા છે, જેમાં દાવો કરવામાં આવી રહ્યો છે કે પોલીસે ગોળીબાર કર્યો છે, પરંતુ આ સત્ય નથી. ભીડને કાબૂમાં લેવા માટે પોલીસે એવા કોઈ હથિયારનો ઉપયોગ કર્યો ન હતો જેનાથી કોઈનું મૃત્યુ થઈ શકે. એસપીએ કહ્યું કે સંભલ પોલીસ સ્ટેશનમાં એફઆઈઆર નોંધવામાં આવી છે. ગુનેગારોને બક્ષવામાં આવશે નહીં.

બદમાશોના ગોળીબારમાં કેટલાક પોલીસકર્મીઓ પણ ઘાયલ થયા છે. દીપા સરાઈ વિસ્તારમાં વધુ હિંસા થઈ હતી. અહીં ફાયરિંગની ઘટનાની તપાસ કરવામાં આવી રહી છે. ડિવિઝનલ કમિશનરે જણાવ્યું કે એસડીએમ રમેશ ચંદ્રા, એરિયા ઓફિસર અનુજ કુમાર અને એસપીના પીઆરઓ પણ ઘાયલ થયા છે.

પુત્રના મોત પર પરિવારનો આક્ષેપ - પોલીસે ગોળીબાર કર્યો હતો

હિંસામાં નઈમ ખાન નામના યુવકનું મોત થયું છે. તેની ઉંમર 32 વર્ષની છે. પરિવારનો આરોપ છે કે સીઈઓની હાજરીમાં પોલીસ ફાયરિંગ કરી રહી હતી. ફાયરિંગમાં ગોળી વાગવાથી નઈમનું મોત થયું હતું. નઈમ વિરોધમાં સામેલ નહોતો. તે દુકાનમાંથી રિફાઈન્ડ તેલ ખરીદવા જઈ રહ્યો હતો.

ઉત્તર પ્રદેશના પૂર્વ મુખ્યમંત્રી અખિલેશ યાદવે સંભલ હિંસા અંગે યોગી સરકાર પર નિશાન સાધ્યું છે. અખિલેશ યાદવે કહ્યું છે કે મસ્જિદ સર્વેક્ષણને લઈને થયેલી કથિત હિંસા એ રાજ્યની પેટાચૂંટણીમાં થયેલી ગેરરીતિઓ પરથી ધ્યાન હટાવવા માટે ભાજપ અને સરકાર દ્વારા રચાયેલું કાવતરું હતું.

મુરાદાબાદના ડિવિઝનલ કમિશનરે જણાવ્યું હતું કે સવારે સાત વાગ્યાથી મસ્જિદમાં સર્વે શરૂ થયો હતો. લગભગ બે કલાક સુધી સર્વે ચાલુ રહ્યો. મુસ્લિમ પક્ષે પણ મસ્જિદના સર્વે માટે સંમતિ દર્શાવી હતી. સર્વે બંને પક્ષોની દેખરેખ હેઠળ હાથ ધરવામાં આવ્યો હતો. સર્વે શાંતિપૂર્ણ અને સરળ રીતે હાથ ધરવામાં આવ્યો હતો, પરંતુ તે દરમિયાન મસ્જિદની બહાર ભીડ એકઠી થઈ ગઈ અને સૂત્રોચ્ચાર કરવા લાગ્યા. ત્યારબાદ પોલીસ પર પથ્થરમારો શરૂ કર્યો હતો. મુરાદાબાદના ડિવિઝનલ કમિશનરના જણાવ્યા અનુસાર, ભીડમાંના કેટલાકને કદાચ નિહિત હિત ધરાવતા વ્યક્તિઓ દ્વારા ઉશ્કેરવામાં આવ્યા હતા, જેનો ઉદ્દેશ્ય વિસ્તારની શાંતિને ભંગ કરવાનો હતો.

ડીજીપી પ્રશાંત કુમારે કહ્યું છે કે સંભલમાં સ્થિતિ નિયંત્રણમાં છે. તમામ સ્થાનિક પોલીસ અને વહીવટીતંત્રના અધિકારીઓ સ્થળ પર છે. દોષિતો સામે કડક કાર્યવાહી કરવામાં આવશે. તે જ સમયે, હિન્દુ પક્ષના વકીલ વિષ્ણુ જૈને કહ્યું છે કે ચંદૌસી કોર્ટના આદેશ પર, એડવોકેટ કમિશનરે સર્વે પૂર્ણ કર્યો છે, જેનો રિપોર્ટ તેઓ 29 નવેમ્બર સુધીમાં કોર્ટમાં રજૂ કરશે. હિંસામાં નઈમ, બિલાલ, નોમાન, કૈફ અને અયાન નામના યુવકોના મોત થયા છે.

કોર્ટના આદેશથી સર્વે હાથ ધરાયો

હિંદુ પક્ષનો દાવો છે કે આજે જે જગ્યાએ જામા મસ્જિદ આવેલી છે, ત્યાં પહેલા હરિહર મંદિર હતું. હિન્દુ પક્ષે આ અંગે સ્થાનિક કોર્ટમાં અરજી કરી હતી. કોર્ટે મસ્જિદના સર્વેનો આદેશ આપ્યો હતો. હિંદુ પક્ષનો દાવો છે કે હરિહર મંદિરને સમ્રાટ બાબર દ્વારા 1529માં તોડી પાડવામાં આવ્યું હતું.