આંધ્રપ્રદેશના ચિત્તૂરમાં બસ અને ટ્રક વચ્ચે સર્જાયો ગમખ્વાર અકસ્માત , 7 મુસાફરોના મોત; 10 ગંભીર રીતે ઈજાગ્રસ્ત

આંધ્રપ્રદેશના ચિત્તૂર જિલ્લામાં શુક્રવારે એક દર્દનાક માર્ગ અકસ્માત થયો હતો. બેંગલુરુ જઈ રહેલી બસ અને ટ્રક વચ્ચે જોરદાર ટક્કર થઈ હતી. આ દુર્ઘટનામાં સાત લોકોના મોત થયા હતા જ્યારે 10 લોકો ગંભીર રીતે ઘાયલ થયા હતા. માહિતી મળતાં જ પોલીસ પહોંચી અને ઘાયલોને તાત્કાલિક હોસ્પિટલમાં દાખલ કર્યા. મૃતદેહોનો કબજો લઈ પોસ્ટમોર્ટમ માટે મોકલી આપવામાં આવ્યો હતો.

અકસ્માત અંગે માહિતી આપતા પોલીસે જણાવ્યું કે શુક્રવારે APSRTCની બસ બેંગલુરુ જઈ રહી હતી. ચિત્તૂર જિલ્લાના પલામાનેરુ મંડલ પાસે મોગિલી ઘાટ રોડ પર બસ એક ટ્રક સાથે અથડાઈ હતી. લોકોએ અકસ્માત અંગે પોલીસને જાણ કરી હતી. માહિતી મળતા જ નજીકના પોલીસ સ્ટેશન ઘટના સ્થળે પહોંચી ગયા હતા. પોલીસે સ્થાનિક લોકોની મદદથી બચાવ કામગીરી હાથ ધરી હતી.

પોલીસે બસની અંદરથી એક પછી એક તમામ મુસાફરોને બહાર કાઢ્યા અને હોસ્પિટલ લઈ ગયા. હોસ્પિટલમાં તબીબોએ સારવાર દરમિયાન સાત લોકોને મૃત જાહેર કર્યા હતા અને અન્યને દાખલ કરીને સારવાર શરૂ કરી હતી. પોલીસના જણાવ્યા અનુસાર ટ્રક ચાલકની ભૂલને કારણે આ અકસ્માત સર્જાયો હતો. બીજી બાજુથી આવતી ટ્રક ખૂબ જ ઝડપે હતી. દરમિયાન તે કાબુ બહાર જઈને ડિવાઈડર ઓળંગીને બસ સાથે અથડાઈ હતી.

ઘટના અંગે માહિતી આપતા એક પોલીસ અધિકારીએ જણાવ્યું કે અકસ્માત બાદ રોડ પર લાંબો જામ થઈ ગયો હતો. ક્રેનની મદદથી અકસ્માતગ્રસ્ત બસ અને ટ્રકને હટાવીને ટ્રાફિક વ્યવસ્થાને પાટા પર લાવવામાં આવી હતી. પોલીસ અધિકારીએ કહ્યું કે અમે સાતેય મૃતદેહોની ઓળખ કરી લીધી છે અને તેમના પરિવારજનોને જાણ કરી છે. આ અકસ્માતમાં 10થી વધુ લોકો ઘાયલ પણ થયા છે. આ તમામની સારવાર ચાલી રહી છે.

આંધ્રપ્રદેશના સીએમ ચંદ્રબાબુ નાયડુએ અકસ્માતમાં મૃત્યુ પામેલા લોકોના પરિવારજનોને 5 લાખ રૂપિયાની આર્થિક સહાયની જાહેરાત કરી છે. તેમજ અકસ્માત અંગે શોક વ્યક્ત કર્યો હતો. તેમણે વહીવટીતંત્રને ઘાયલોને યોગ્ય સારવાર આપવાનો નિર્દેશ આપ્યો હતો. તેમની સારવારમાં કોઈ બેદરકારી ન રાખવી જોઈએ.