હાથમાં બંધારણનાં પુસ્તક સાથે પ્રિયંકા ગાંધીએ સંસદ સભ્ય તરીકે લીધા શપથ

પહેલીવાર લોકસભામાં ચૂંટાયેલા પ્રિયંકા ગાંધી વાડ્રાએ આજે સાંસદ તરીકે શપથ લીધા. માતા સોનિયા ગાંધી અને ભાઈ રાહુલ ઉપરાંત તેમના પુત્ર રેહાન વાડ્રા અને પુત્રી મિરાયા વાડ્રા પણ સંસદ ભવનમાં હાજર હતા.

શપથ લીધા બાદ પ્રિયંકાએ લોકસભા સ્પીકર ઓમ બિરલાને હાથ જોડીને શુભેચ્છા પણ પાઠવી હતી. ત્યારબાદ પ્રિયંકાએ પ્રથમ હરોળમાં બેઠેલા વિપક્ષી નેતાઓનું હાથ જોડીને અભિવાદન કર્યું. ગૃહમાં વિપક્ષના નેતા અને તેમના ભાઈ રાહુલ ગાંધીએ પણ હાથ જોડીને તેમનું અભિવાદન સ્વીકાર્યું.

શપથ લીધા બાદ પ્રિયંકા વિપક્ષી સાંસદો માટેની બેઠકોની ચોથી હરોળમાં ગઈ અને ત્યાં બેસી ગઈ. જ્યારે લોકસભામાં વિપક્ષના નેતા રાહુલ ગાંધી પહેલી હરોળમાં બેઠા હતા. આ પહેલા પુત્ર રેહાન અને પુત્રી મિરાયા વાડ્રા પણ કોંગ્રેસ નેતા પ્રિયંકા ગાંધીના શપથ ગ્રહણ કાર્યક્રમમાં હાજરી આપવા સંસદ ભવન પહોંચ્યા હતા. પ્રિયંકા તેની માતા સોનિયા ગાંધી સાથે સંસદ ભવન આવી હતી

પહેલીવાર ચૂંટણી લડ્યા અને સાંસદ બન્યા

પ્રિયંકા ગાંધી પહેલીવાર ચૂંટણી લડ્યા હતા. ગયા અઠવાડિયે સમાપ્ત થયેલી કેરળની વાયનાડ લોકસભા બેઠકની પેટાચૂંટણીમાં તે સભ્ય તરીકે ચૂંટાઈ આવી હતી. તેમણે વાયનાડ લોકસભા પેટાચૂંટણી ચાર લાખથી વધુ મતોના માર્જિનથી જીતી છે.

પ્રિયંકા ઉપરાંત મહારાષ્ટ્રની નાંદેડ લોકસભા બેઠક પરથી ચૂંટાયેલા કોંગ્રેસના નેતા રવીન્દ્ર બસંતરાવ ચવ્હાણે પણ આજે ગૃહના સભ્ય તરીકે શપથ લીધા હતા. ચવ્હાણે મરાઠી ભાષામાં શપથ લીધા.

ગૃહમાં ગાંધી-નેહરુ પરિવારના 3 સભ્યો

દેશના ઈતિહાસમાં આ પહેલીવાર છે જ્યારે ગાંધી-નેહરુ પરિવારના ત્રણ સભ્યો સંસદમાં જોવા મળશે. પ્રિયંકા ગાંધીના ભાઈ રાહુલ ગાંધી લોકસભામાં વિપક્ષના નેતા છે જ્યારે તેમની માતા સોનિયા ગાંધી રાજ્યસભાના સાંસદ છે. પ્રિયંકા પહેલીવાર કોઈ ગૃહની સભ્ય બની છે.

પ્રિયંકા ગાંધીએ 5 વર્ષ પહેલા 2019ની લોકસભા ચૂંટણી દરમિયાન સક્રિય રાજકારણમાં પ્રવેશ કર્યો હતો, જ્યારે તેમણે ચૂંટણી લડી ન હતી. ત્યારથી તે પાર્ટીના મહાસચિવ તરીકે પોતાની જવાબદારીઓ નિભાવી રહી છે.