ફેબ્રુઆરીમાં અમેરિકાની મુલાકાત લઈ શકે છે પીએમ મોદી, ટેલીફોનીક વાતચીતમાં ટ્રમ્પે આપ્યું આમંત્રણ

વડા પ્રધાન નરેન્દ્ર મોદી અને અમેરિકાના નવા રાષ્ટ્રપતિ ડોનાલ્ડ ટ્રમ્પ વચ્ચે ફોન પર વાતચીત થઈ. ટ્રમ્પ રાષ્ટ્રપતિ બન્યા પછી બંને વચ્ચે આ પહેલી વાતચીત છે. આ વાતચીત અંગે પીએમ મોદીએ સોશિયલ મીડિયા પર એક પોસ્ટ પણ મૂકી છે. આ ઉપરાંત, વ્હાઇટ હાઉસે વાતચીતની વિગતો પણ જાહેર કરી છે. જેમાં બંને નેતાઓ વચ્ચે શું ચર્ચા થઈ તે જણાવવામાં આવ્યું છે. અહીં મહત્વની વાત એ છે કે ટ્રમ્પે પીએમ મોદી સાથે બંને દેશો વચ્ચે વેપાર અંગે વાત કરી છે. આ દરમિયાન ટ્રમ્પે પીએમ મોદીને અમેરિકા આવવાનું આમંત્રણ આપ્યું છે.

વ્હાઇટ હાઉસે જણાવ્યું હતું કે રાષ્ટ્રપતિ ડોનાલ્ડ ટ્રમ્પ અને ભારતના વડા પ્રધાન નરેન્દ્ર મોદી વચ્ચે વાતચીત થઈ છે. આ દરમિયાન બંને નેતાઓએ સહયોગ વધારવા અને સંબંધોને ગાઢ બનાવવા વિશે વાત કરી. ટ્રમ્પ અને મોદીએ ઈન્ડો-પેસિફિક, મધ્ય પૂર્વ અને યુરોપમાં સુરક્ષા સહિત અનેક પ્રાદેશિક મુદ્દાઓ પર પણ ચર્ચા કરી.રાષ્ટ્રપતિ ટ્રમ્પે ભારત દ્વારા અમેરિકી સુરક્ષા સાધનોની ખરીદી વધારવા અને દ્વિપક્ષીય વેપાર સંબંધો તરફ આગળ વધવાના મહત્વ પર ભાર મૂક્યો છે.

પીએમ મોદી ટૂંક સમયમાં અમેરિકાની મુલાકાત લેશે

બંને નેતાઓએ દેશો વચ્ચેની મિત્રતા અને વ્યૂહાત્મક સંબંધોને ધ્યાનમાં રાખીને પીએમ મોદીની વ્હાઇટ હાઉસ મુલાકાતની યોજનાઓ પર પણ ચર્ચા કરી. ટ્રમ્પે પીએમ મોદીને ટૂંક સમયમાં અમેરિકા આવવાનું આમંત્રણ આપ્યું છે.

આ દરમિયાન, પીએમ મોદી અને રાષ્ટ્રપતિ ટ્રમ્પે યુએસ-ભારત વ્યૂહાત્મક ભાગીદારી અને ઈન્ડો-પેસિફિક ક્વાડ ભાગીદારીને આગળ વધારવાની તેમની પ્રતિબદ્ધતા પર ભાર મૂક્યો. વ્હાઇટ હાઉસે પોતાના નિવેદનમાં એમ પણ કહ્યું કે ભારત આ વર્ષના અંતમાં પહેલી વાર ક્વાડ નેતાઓનું આયોજન કરશે.

સોશિયલ મીડિયા પ્લેટફોર્મ ટ્વિટર પરની પોતાની પોસ્ટમાં, પ્રધાનમંત્રીએ લખ્યું કે તેઓ તેમના પ્રિય મિત્ર રાષ્ટ્રપતિ ડોનાલ્ડ ટ્રમ્પ સાથે વાત કરીને ખૂબ ખુશ થયા. તેમના ઐતિહાસિક બીજા કાર્યકાળ બદલ તેમને અભિનંદન. અમે પરસ્પર લાભદાયી અને વિશ્વસનીય ભાગીદારી માટે પ્રતિબદ્ધ છીએ. આપણે આપણા લોકોના કલ્યાણ માટે અને વૈશ્વિક શાંતિ, સમૃદ્ધિ અને સુરક્ષા માટે સાથે મળીને કામ કરીશું.