ઉત્તરપ્રદેશ: કાશી વિશ્વનાથ મંદિરના ગેટ પાસે અકસ્માત, બે મકાન ધરાશાયી,રેસ્ક્યુ ઓપરેશન શરુ

સોમવારે મોડી રાત્રે કાશી વિશ્વનાથ મંદિર પાસે એક મોટો અકસ્માત થયો હતો. અહીં 70 વર્ષ જૂના બે મકાનો ધરાશાયી થયા હતા . આ ઘટનામાં અનેક લોકો દટાયા હોવાની આશંકા છે

samay mirror

August 06, 2024

1 minute

નેશનલ

સોમવારે મોડી રાત્રે કાશી વિશ્વનાથ મંદિર પાસે એક મોટો અકસ્માત થયો હતો. અહીં 70 વર્ષ જૂના બે મકાનો ધરાશાયી થયા હતા . આ ઘટનામાં અનેક લોકો દટાયા હોવાની આશંકા છે. ઘટના બાદ વિશ્વનાથ મંદિરનો ગેટ નંબર ચાર બંધ કરી દેવામાં આવ્યો છે. આ ગેટ પર આવતા શ્રદ્ધાળુઓને ગેટ નંબર એક અને બેમાંથી એન્ટ્રી આપવામાં આવી રહી છે.

વારાણસીના કાશી વિશ્વનાથ મંદિર પાસે યલો ઝોનમાં એક મોટી દુર્ઘટના થઈ છે. અહીં ખોઆ ગલી ઈન્ટરસેક્શન પાસે આવેલા બે મકાનો ધરાશાયી થઈ ગયા. આ ઘટના સોમવારે મોડી રાત્રે બની હતી. આ અકસ્માતમાં એક કોન્સ્ટેબલ અને બે મહિલાઓ સહિત પાંચથી વધુ લોકો દટાયા હોવાની આશંકા છે. માહિતી મળતાની સાથે જ ચોક પોલીસ સ્ટેશન એક્શનમાં આવી ગયું હતું અને ડિઝાસ્ટર રિલીફ ટીમ સાથે રાહત કાર્ય શરૂ કર્યું હતું. પરિસ્થિતિની ગંભીરતાને ધ્યાનમાં રાખીને વહીવટીતંત્રે મૈદગીન બાજુથી વિશ્વનાથ મંદિર તરફ આવતા માર્ગ પરનો ગેટ નંબર 4 બંધ કરી દીધો છે.

પોલીસના જણાવ્યા અનુસાર, હાલમાં વિશ્વનાથ મંદિરમાં આવતા શ્રદ્ધાળુઓને ગેટ નંબર એક અને બેથી પ્રવેશ આપવામાં આવી રહ્યો છે. ઘટના સ્થળે એનડીઆરએફ અને એસડીઆરએફ તેમજ ફાયર બ્રિગેડની ટીમ રાહત કાર્યમાં લાગેલી છે. આ ત્રણ માળની ઈમારતનો કાટમાળ ખૂબ કાળજી સાથે હટાવવામાં આવી રહ્યો છે.

બનારસમાં ઘણા દિવસોથી વરસાદ પડી રહ્યો હોવાથી આ ઘરના પાયામાં પણ પાણી ભરાઈ ગયા હતા. જેના કારણે સોમવારે મોડી રાત્રે એક મકાન ધરાશાયી થયું હતું અને આંચકાના કારણે તેની બાજુમાં રહેલું અન્ય એક મકાન પણ ધરાશાયી થયું હતું. બચાવ કાર્યમાં લાગેલી પોલીસે જણાવ્યું કે હજુ સુધી એ સ્પષ્ટ નથી થયું કે કાટમાળ નીચે કેટલા લોકો દટાયા છે.

અત્યાર સુધી ઉત્તર પ્રદેશ પોલીસના એક કોન્સ્ટેબલ અને બે મહિલાઓ સહિત પાંચથી વધુ લોકોના દટાયા હોવાની આશંકા છે. આ તમામ લોકોને સુરક્ષિત બહાર કાઢવા માટે મોટા પાયે રાહત કામગીરી શરૂ કરવામાં આવી છે. હાથ વડે અને જેસીબીની મદદથી કાટમાળ હટાવવામાં આવી રહ્યો છે. સાથે જ અન્ય કોઈ ઘટના ન બને તે માટે મંદિર રોડનો ગેટ નંબર ચાર બંધ કરી દેવામાં આવ્યો છે.