આસામની કોલસાની ખાણમાં મોટી દુર્ઘટના, પાણી ભરાવાને કારણે 9 મજુરો ફસાયા, NDRFએ રેસ્ક્યુ ઓપરેશન કર્યું શરુ

આસામમાં મેઘાલય સરહદને અડીને આવેલી ઉમરાંગસો દિમા હસાઉની કોલસાની ખાણમાં અચાનક પાણી ભરાઈ ગયું. ઘટના સમયે ખાણની અંદર ડઝનબંધ મજૂરો કામ કરી રહ્યા હતા. સદનસીબે અમુક કામદારો સમયસર બહાર આવી ગયા હતા, પરંતુ લગભગ એક ડઝન જેટલા કામદારો ફસાયા હોવાની આશંકા છે. માહિતી મળતાની સાથે જ SDRF, NDRF અને જિલ્લા વહીવટીતંત્રની ટીમોએ ખાણની અંદર ફસાયેલા કામદારોને બચાવવાના પ્રયાસો તેજ કર્યા હતા.

આ ક્રમમાં, સીએમ હિમંતા વિશ્વ સરમાએ આ ઘટના પર દુખ વ્યક્ત કર્યું અને તમામ કામદારોના સુરક્ષિત વાપસીની કામના કરી. ઘટના સોમવારે બપોરે બની હતી. કહેવામાં આવી રહ્યું છે કે આ ખાણ લગભગ 300 ફૂટ ઊંડી છે અને તે 100 ફૂટથી વધુ પાણીથી ભરેલી છે. સોશિયલ મીડિયા પર દુઃખ વ્યક્ત કરતા મુખ્યમંત્રી હિમંતા વિશ્વ સરમાએ કહ્યું કે હજુ સુધી એ સ્પષ્ટ નથી થયું કે ખાણમાં કેટલા કામદારો ફસાયેલા છે. જોકે, NDRF અને SDRFની ટીમો ખાણમાં ફસાયેલા લોકોને બચાવવા માટે વ્યાપક તૈયારીઓ કરી રહી છે.

તેમણે તમામ કામદારોના સુરક્ષિત પાછા ફરવા માટે ભગવાનને પ્રાર્થના કરી. મુખ્યમંત્રીએ સોશિયલ મીડિયા પર જ નવ મજૂરોની યાદી જાહેર કરી છે. જણાવ્યું હતું કે અત્યાર સુધી માત્ર આ નવ મજૂરોના ફસાયા હોવાની પુષ્ટિ થઈ છે. મુખ્યમંત્રી દ્વારા જાહેર કરવામાં આવેલી યાદી મુજબ નેપાળી મજૂર ગંગા બહાદુર શ્રેઠ સિવાય હુસૈન અલી, ઝાકિર હુસૈન, સરપા બર્મન, મુસ્તફા સેખ અને આસામના રહેવાસી કુશી મોહન રાય ખાણની અંદર ફસાયેલા છે. એ જ રીતે પશ્ચિમ બંગાળના જલાપાઈ ગુડીના રહેવાસી સંજીત સરકાર ઉપરાંત આસામના લીજન મગર અને સરત ગોયારીનો પણ સમાવેશ થાય છે.

રાહત અને બચાવ કાર્યમાં લાગેલી ટીમો

આ તમામ મજૂરોના નામની પુષ્ટિ થઈ ગઈ છે. બાકી કામદારો વિશે માહિતી એકત્રિત કરવામાં આવી રહી છે. પોલીસ સૂત્રોના જણાવ્યા અનુસાર ખાણની અંદર 15 કામદારો ફસાયા હોવાની આશંકા છે. જો કે, બાકીના છ મજૂરો કોણ છે તેની પુષ્ટિ થવાની બાકી છે. બીજી તરફ એસપી મયંક કુમાર ઝાએ કહ્યું કે પડકારજનક પરિસ્થિતિ હોવા છતાં રાહત અને બચાવ ટીમો પૂરી તાકાતથી કામ કરી રહી છે. ખાણમાં ફસાયેલા તમામ કામદારોને સુરક્ષિત બહાર કાઢવાના તમામ પ્રયાસો કરવામાં આવી રહ્યા છે.