બિહારના પટનાનાં ઈસ્કોન મંદિરમાં બે જૂથો વચ્ચે ઉગ્ર બોલાચાલી થઇ અથડામણ, જાણો શું છે મામલો?

બિહારની રાજધાની પટનાના ઈસ્કોન મંદિરમાં રવિવારે મોટો હંગામો થયો હતો. અહીં ભાગલપુર ઇસ્કોન મંદિરથી આવેલા બ્રહ્મચારીઓને ભારે માર મારવામાં આવ્યો હતો. આરોપ છે કે પટના ઈસ્કોન મંદિરના પ્રમુખે ભાગલપુરના બ્રહ્મચારીઓને મીટિંગ માટે બોલાવ્યા હતા. આ દરમિયાન જ્યારે વિવાદ થયો ત્યારે બાઉન્સરોએ તેમની સૂચના પર આ ઘટનાને અંજામ આપ્યો. માહિતી મળ્યા બાદ ઘટનાસ્થળે પહોંચેલી પોલીસે હજુ સુધી કોઈ કેસ નોંધ્યો નથી, પરંતુ આ મામલાની તપાસ શરૂ કરી છે.

આ અંગે ભાગલપુર ઈસ્કોન મંદિરથી આવેલા બ્રહ્મચારીઓએ પોલીસમાં ફરિયાદ પણ નોંધાવી છે. પોલીસ પાસે પહોંચેલા બ્રહ્મચારીઓએ જણાવ્યું કે મંદિરના પ્રમુખ મંદિર પરિસરમાં અનેક અનૈતિક કામો કરી રહ્યા છે. આ અંગે તેઓએ સંસ્થાના સત્તાધીશોને ફરિયાદ કરી હતી. આ મામલામાં મંદિરના પ્રમુખે મિટિંગ બોલાવી હતી અને અહીં આવતાં જ તેમની સાથે મારપીટ કરવામાં આવી હતી. બ્રહ્મચારીઓના જણાવ્યા અનુસાર મંદિર પ્રમુખનો એક વાંધાજનક વીડિયો પણ સોશિયલ મીડિયા પર વાયરલ થયો છે.

બાદમાં બ્રહ્મચારીઓએ પોલીસ પર મંદિરના પ્રમુખ સાથે મિલીભગતનો આરોપ પણ લગાવ્યો હતો. આ ઘટનાને કારણે તેના શરીર પર ઈજાના નિશાન દેખાઈ રહ્યા હોવાનું જણાવ્યું હતું. તેઓએ સમગ્ર ઘટના પોલીસને જણાવી, છતાં પોલીસે ગુનો નોંધ્યો ન હતો. જો કે, પટના પોલીસના ડીએસપી કાયદો અને વ્યવસ્થા કૃષ્ણ મુરારી પ્રસાદે કહ્યું કે મામલાની તપાસ કરવામાં આવી રહી છે. તેમણે જણાવ્યું કે માહિતી મળ્યા બાદ તેઓ પોતે મોડી રાત્રે મંદિર પહોંચ્યા અને ઘટના સ્થળનું નિરીક્ષણ કર્યું. તેમણે કહ્યું કે આ વિવાદ ઈસ્કોન મંદિરના વહીવટ પર નિયંત્રણને લઈને થયો હતો.

આ માટે મેનેજમેન્ટમાં પહેલેથી જ જૂથવાદ ચાલી રહ્યો છે. પોલીસના જણાવ્યા અનુસાર, ઇસ્કોન મંદિરથી ભાગલપુર ટ્રાન્સફર કરાયેલા એક બાલયોગીએ ફરિયાદ નોંધાવી છે. જેમાં પટના ઈસ્કોન મંદિર પ્રશાસન પર ગંભીર આરોપો લગાવવામાં આવ્યા છે. હાલ પોલીસે ફરિયાદ અને ઘટનાસ્થળેથી મળેલી હકીકતના આધારે કેસની તપાસ શરૂ કરી છે. તપાસ દરમિયાન જે પણ તથ્યો બહાર આવશે તે મુજબ આગળની કાર્યવાહી કરવામાં આવશે. બીજી તરફ પટના ઈસ્કોન મંદિર મેનેજમેન્ટે દાવો કર્યો છે કે સોશિયલ મીડિયા પર હાલમાં જે વીડિયો વાયરલ થઈ રહ્યો છે તે લગભગ છ વર્ષ જૂનો છે. ત્યારે એક ષડયંત્રના ભાગરૂપે મંદિર પ્રમુખને વાંધાજનક મામલે ફસાવવાનો પ્રયાસ કરવામાં આવ્યો હતો.