લોકગાયિકા રાજલ બારોટ ઉનાના યુવા નેતા સાથે લગ્નગ્રંથિથી જોડાશે

ગુજરાતના લોકગાયક સ્વ.મણિરાજ બારોટની બીજા નંબરની દિકરી રાજલ બારોટ પોતાના માતાપિતાની છત્રછાયા નાની ઉંમરે ગુમાવ્યા બાદ ભાઈ નહીં હોવાથી 3 બહેનોની એકલા જવાબદારી ઊઠાવીને લગ્ન કરાવી દીધા બાદ પોતે પણ આગામી 4 ફેબ્રુઆરીના ઊનાના યુવા રાજકીય નેતા અને સામાજિક આગેવાન નગર સેવક અલ્પેશ બાંભણીયા સાથે લગ્ન બંધનમાં બંધાઈ સાંસારીક જીવનની શરૂઆત કરશે. સ્વ.મણિરાજ બારોટની પુત્રી રાજલ બારોટ લોકગાયિકા તરીકે ઉભરી આવનાર ગુજરાતની પ્રખ્યાત લોકગાયક બનીને દેશ વિદેશમાં ગુજરાતનું ગૌરવ વધાર્યું છે.

રાજલ બારોટનો જન્મ પાટણના બાલવા ખાતે થયો હતો. ગાયકીનું પ્રથમ શિક્ષણ તેના પિતાએ આપ્યું હતું અને જુલાઈ 2006માં પહેલી વખત લોકગીતની પ્રસ્તુતિ આપી હતી. જેના શબ્દો હતા, ‘હેલ ભરીને હું તો હાલું ઉતાવળી' અને તે લોકગીત માટે રાજલને પ્રોત્સાહક ઇનામ અપાયું હતું. રાજલે ૧૩ વર્ષની નાની ઉંમરે ગાવાનું શરૂ કર્યું હતું. અત્યાર સુધીમાં 70 કરતા પણ વધુ આલ્બમોમાં પ્લેબેક સિંગિગ કરી ચૂકી છે. જેમાં આઈ જવાની આઈ, જવાની આ જવાની, દશામાની લીમડી, ચુડેલ માંના ધામમાં, લવનો ડેન્ગ્યુ, ઢોલો ગુજરાતનો, ઢોલો હાલ્યો પરદેશ, દશામાની પૂજા, અંબેમાંનો ટાઈગર, ગુજરાતની સિંહણ, એકડે એક અંબેમાંની ટેક, ગલોલો, અંબેમાં મોંઘવારી બની ડાકણ, સુરતની ભનજૂરિયુ, આ સિવાય માણીગર ઢોલા અને રાજલ, હિરલની ધમાલ જેવા સોંગ્સનો સમાવેશ થાય છે.

રાજલ અને તેમની 3 બહેનને કોઈ ભાઈ ન હોવાથી રક્ષાબંધન પર તેઓ પોતાના જ ઘરે એકબીજાને રાખડી બાંધે છે અને એકબીજા પાસેથી હંમેશાં સાથે અને સંપીને રહેવાનું વચન માગે છે. જીવનમાં કોઈ પણ પરિસ્થિતિ આવે, એકબીજાની પડખે ઊભા રહીને મદદ કરવાનું એકબીજાને વચન આપે છે.

તો રક્ષાબંધન પર હંમેશા રક્ષા કરનારો ભાઈ બની જતી રાજલ બહેનોની વિદાઈ વેળાએ એક માં બનીને દરેક જવાબદારીઓ પૂર્ણ કરી હતી. બહેન હોવાની સાથે માતાપિતાની પણ ફરજ બજાવીને સમાજમાં દાખલો બેસાડ્યો છે. રાજલે તેની એક મોટી બહેન અને નાની બહેનનાં થોડા વર્ષો અગાઉ ધામધુમથી લગ્ન કરાવ્યા હતા અને બન્ને બહેનોનું કન્યાદાન કર્યું હતું. એ વખતે ગાંધીનગરમાં યોજાયેલા આ લગ્ન પ્રસંગમાં રાજલ ધ્રુસકે ધ્રુસકે રડી પડી હતી. આ લગ્નમાં જીગ્નેશ કવિરાજથી લઈને માયાભાઈ આહિર સહિતના ગુજરાતના ખ્યાતનામ કલાકારો હાજર રહ્યા હતા.

રાજલ બારોટે 20 મેના રોજ ઊનાના કોળી સમાજનાં અગ્રણી કાનજીભાઈ ભગવાનભાઈ બાંભણીયાના પુત્ર અને પાલિકાના સભ્ય અલ્પેશ સાથે ધામધૂમથી સગાઈ કરી હતી. અલ્પેશ બાંભણીયા ઊનાના કોળી સમાજના અગ્રણી અને પૂર્વ નગરપતિ સ્વ. છગનભાઈ બાંભણીયાનાં નાનાભાઈ કોળી સમાજના નેતા પૂર્વ નગરસેવક અને ખેડુત અગ્રણી કાનજીભાઈ ભગવાનભાઈ બાંભણીયાના પુત્ર છે. પંથકમાં સારી એવી લોકચાહના ધરાવે છે. અલ્પેશભાઈ ઊના પાલિકાનાં કાઉન્સિલર તરીકે ચુંટાઈ આવ્યા છે.